O Museo do Gravado de Artes (Ribeira) vai inaugurar este mes de abril a exposición Colmeiro. Punta seca. A apertura oficial da mostra será o vindeiro venres 21 de abril, na Sala 0 do Museo do Gravado, a partir das 20.00 horas.
Neste acto faráselle entrega ao representante da Deputación da Coruña e ao conselleiro de Cultura, Educación, Formación Profesional e Universidades, Román Rodriguez, do estoxo cos 48 gravados á punta seca realizado a partir das matrices orixinais do artista cedidas pola familia. Todos os gravados e as súas matrices poderán verse na exposición. Está prevista a asistencia dos familiares de Manuel Colmeiro.
Esta exposición poderá visitarse do 21 de abril ao 30 de xuño de 2023.
Manuel Colmeiro é considerado un dos grandes protagonistas da renovación artística galega do primeiro terzo do século XX, xunto con Carlos Maside, Arturo Souto, Fernández Mazas ou Luís Seoane. Da obra de Colmeiro dixo o rianxeiro Rafael Dieste: “Colmeiro, pintor, fala en galego, que é un dos modos fondos, leais e verídicos de falar en español” e Carlos Maside. “Galicia ten un pintor, tan seu, tan representativo nesta arte como o foi, quizais, Rosalía na lírica”.
