O Concello de Boiro comezou as obras para a execución de beirarrúas en Barraña, concretamente na rúa Traballadoras do Mar, para mellorar a seguridade viaria de condutores e peóns no acceso á dita praia de Barraña.
En concreto as actuacións levaranse a cabo nun tramo de estrada que une o paseo marítimo coa avenida de Barraña, nunha intersección pola que, segundo lembra o Concello, “transitan numerosos peóns, sobre todo en época estival”. O obxectivo desta actuación é mellorar a seguridade viaria de condutores e peóns nunha estrada que é acceso á praia.
As actuacións desenvolveranse nun treito de xeito paralelo ao carril bici para continuar pola estrada que chega á dita avenida, unha zona de dobre sentido de circulación e na que xa se actuou para limitar o aparcamento pero pola que os peóns, en moitas ocasións, se ven obrigados a transitar pola estrada.
