Este mércores 19 de abril o alumnado do Certificado de Confección e Montaxe de Artes e Aparellos do Obradoiro de Emprego Tahume VIII (impulsado polos concellos de Porto do Son e Ribeira) comezou a actuación de protección ambiental e mellora nas pasarelas que van a desenvolver na praia do Cruceiro de Porto do Son. En concreto, están a traballar na disposición de redes de elaboración propia para a protección da contorna natural.
A oitava edición do Obradoiro de Emprego Tahume comezou o pasado 3 de outubro, sendo a súa finalidade favorecer a inserción laboral das persoas desempregadas dos dous municipios (Ribeira e Porto do Son) a través de formación especializada, avanzada e dunha índole marcadamente práctica, poñendo o foco na mocidade local. Un total de vinte alumnos e alumnas participan nesta convocatoria, unha edición dual con dúas especialidades distintas: por unha banda operacións básicas de cociña e pastelería e, pola outra, confección e montaxe de artes e aparellos.
A especialidade de Confección e Montaxe de Artes e Aparellos, está dirixida a oito persoas. Nesta formación, os asistentes desenvolverán este tipo de traballos para fondos expositivos dos museos, ambientación de feiras e outras actividades estivais, decoración de espazos urbanos, divulgación en centros escolares ou para o seu uso en instalacións deportivas, para canastras, porterías, etc…
