Os promotores do Manifesto de Burela contra os Plans de Ordenación do Espazo Marítimo (POEM) non queren deixarse levar pola corrente como esta levou sempre ao camarón que se durme. E por non querer no admiten nen sequera o Real Decreto 150/2023, de 28 de febreiro, polo que foron aprobados eses plans que cito e que contemplan o despregamento da eólica mariña en cinco demarcacións das costas españolas.
Para que sexa así, os promotores dese Manifesto de Burela presentaron esta semana un recurso contencioso administrativo contra o devandito Real Decreto que senta as bases da que cualifican como “loita xudicial” para “salvar a pesca e os ecosistemas” seguindo a vía política e de resposta cidadá nunha mobilización contra “ese” tipo de eólica mariña. Porque o sector pesqueiro acepta as enerxías renovables “pero non así”, non como as queren as grandes eléctricas co obxectivo de incrementar os seus xa moi grandes beneficios a costa, desta vez, de ocasionar graves perdas socioeconómicas nun sector -o pesqueiro- que non podería vivir baixo os xigantescos viraventos que se pretenden “asentar” no mar e, máis en concreto, nos mellores caladoiros de pesca para os barcos artesanais.
Non, os mariñeiros, as súas familias, as súas industrias, os seus pobos e vilas non queren ser soxulgados por unha enerxia que non xera beneficios á vida dos traballadores e sí esclusiva rendibilidade económica aos que xa están afeitos a amasar beneficios sobre beneficios cando a estes non chegan. nin en soños, os que reclaman vida onde se lles brinda morte: a dos peixes que son para, dentro dun orde, pescar e dar vida aos seres humanos, e non esclusivamente engordar a conta de resultados dos que, ao remate, acabarán chamándose Andana cando xa non haiba que pescar.
Diante do previsible impacto dos POEM o que realmente importa é a defensa do sector pesqueiro e do medio ambiente mariño, e non esclusivamente desde unha formulación ecoloxista (que tamén). De aquí que a Plataforma e Defensa da Pesca e dos Ecosistemas Mariños en colaboración co Observatorio do Litoral da Universidade da Coruña (UDC) teñan materializada a súa alianza coa sinatura dun convenio de cooperación que tente avanzar cara obxectivos comúns nos eidos académico, científico e cultural.
Interesa coñecer os efectos que pode ter a instalación da enerxía eólica na plataforma continental sobre os recursos mariños e sobre a pesca; o alcance, contido e efectos dos POEM en zonas de alto potencial para a enerxía eólica e as accións a levar a cabo para protexer os intereses do sector pesqueiro. Cando se teñan e valorfen estes datos, o mar e a pesca poderán seguir a ser a despensa da que todos podamos vivir e convivir cos xigantescos muiños que non triturarán os soños de milkleiros de homes e mulleres cuxas vjudas dependen únicamente de saberen deseñar un futuro unha vez aprendido o presente.
