A empresa Midón, adxudicataria do proxecto de abastecemento de Corques en Taragoña (a través do Plan Único da Deputación da Coruña), iniciou os primeiros traballos na aldea. Esta obra levará a traída municipal ao conxunto de Corques e permitirá chegar ao cruce coa estrada AC-305, segundo informou o Concello de Rianxo, engadindo que a actuación supón o asfaltado posterior de toda a zona afectada pola obra.
O importe de adxudicación é de 99.751,55 euros e abrangue unhas 25 vivendas. Supón ademais un treito que abastecerá desde o depósito de Taragoña toda a AC-305 até o Araño.
O prazo de execución é de dous meses, polo que “é de agardar que neste verán estea finalizado e garantido un subministro con problemas no estío”, engadiron fontes do Consistorio, lembrando que o proxecto desenvólvese con fondos da Deputación (Plan Único) asignados polo Concello.
