No marco do Programa de Dinamización e Promoción Social das Persoas Maiores, a Aula do Maior de Aguiño vai dar cabida o próximo mes de maio a dous cursos de móbil Android para familiarizar e mellorar o manexo destes dispositivos. As clases terán lugar os días 9, 11, 16 e 18 de maio, en quendas de 10 a 11 e de 11 a 12 horas.
As persoas participantes aprenderán a instalar e desinstalar aplicacións móbiles, utilizar a cámara e a galería de imaxes, enviar e recibir mensaxes por Whatsapp e inscribir contactos, entre outros coñecementos.
As veciñas e veciños interesadas/os poden inscribirse no Departamento de Servizos Sociais (teléfono: 981 874 131).
Trátase dunha acción promovida pola Consellería de Servizos Sociais en colaboración coa Rede CeMIT.
