A ABE boirense presentou unha nova campaña de afiliación que pon o foco nas dez principais vantaxes que lles reportaría aos negocios e establecementos locais adherirse á patronal. Será unha iniciativa de mercadotecnia dixital para que, en palabras da ABE, “as persoas empresarias que aínda non están asociadas nos coñezan”. A campaña actívase este 12 de abril e inclúe o lanzamento (cada semana nas redes e en www.abe.gal) dunha das dez razóns devanditas para afiliarse á asociación. Así até completar as 10 fixadas en orixe.
Outra novidade dentro do sistema de captación que implementa a ABE dende este 12 de abril é a caixa de benvida, trátase dun orixinal soporte elaborado expresamente para cando unha nova empresa se dea de alta e contén un pack composto polo seguinte:
Adhesivo identificativo para o negocio
Calendario laboral de Boiro
Guía con información para novos socios
Botella de auga de vidro
Cunca
Bolsa de algodón orgánico
Bolígrafos
Block de notas ABE
O obxectivo, en palabras da patronal boirense, é “termos ordenada a documentación que entregamos aos novos socios e tamén potenciar a imaxe de marca da entidade xa que tentaremos deixar constancia da entrega para poder difundila en redes sociais”.
En paralelo a campaña reforzarase coa comunicación interna. Así, “aínda que moitas das empresas socias levan tempo asociadas sempre está ben recordar o que podemos facer por eles, neste sentido temos un documento novo que imos a empezar a usar cando se da de alta un novo socio no que se explican varios dos servizos de maior demanda e que os socios va poder consultar ou descargar sempre dende a nosa web www.abe.gal”, engaden dende a asociación.
Actualmente a ABE conta con 198 empresas asociadas.
