A ABE de Boiro é a primeira asociación empresarial do ámbito estatal en ser admitida no Pacto Pola Xeración D

05 Abril 2023

Na mañá deste mércores 5 de abril a Asociación Boirense de Empresarios (ABE) recibiu de mans da Vicepresidencia Primeira do Gobierno de España e do Ministerio de Asuntos Económicos e Transformación Dixital a confirmación da adhesión da entidade boirense como membro do Pacto pola Xeración D (Pacto por la Generación D) que impulsa o Executivo estatal. Deste xeito, a patronal de Boiro sitúase como a primeira asociación empresarial da xeografía española en ser admitida no dito pacto.

Como explicou o presidente, Daniel García “xunto coa ratificación da adhesión e a correspondente benvida tamén recibimos o selo oficial Xeración D, que é a acreditación de que a ABE é membro do pacto e que a partir de hoxe mesmo debemos incluír nas iniciativas, proxectos e actividades que impulsemos neste ámbito”.

Que é o pacto pola Xeración D

O Pacto pola Xeración D é unha iniciativa do Gobierno de España cuxos obxectivos van dirixidos ao ámbito da dixitalización, como explica o xerente do ABE, Tomás Estévez, que será quen actúe como interlocutor coa Secretaría de Estado de Dixitalización e Intelixencia Artificial, “trátase de proporcionar un espazo aos axentes sociais, as asociacións, as empresas, as entidades sociais, as fundacións e os medios de comunicación para dar a coñecer as súas propias iniciativas, sensibilizar á sociedade sobre como apoiar proxectos e iniciativas dirixidas a superar fendas dixitais, potenciar a transformación dixital das pemes ou impulsar a certificación de niveis de desempeño en materia de competencias dixitais entre outras”.

Compromiso da ABE

Ao apoiar o manifesto a asociación comprométese a contribuír a alcanzar os obxectivos estratéxicos do Plan Nacional de Competencias Dixitais. Así o explica o presidente da entidade boirense: “De forma máis concreta a patronal de Boiro debe continuar impulsando iniciativas, proxectos, actividades, etc. que contribúan á adquisición, ao desenvolvemento e á mellora das competencias dixitais como coas accións formativas tanto para ocupados como para desempregados que organiza nas súas aulas durante todo o ano”. Ademais, establécense as obrigas de comunicar á Secretaría de Estado de Dixitalización e Intelixencia Artificial as iniciativas, proxectos e actividades que poidan ser susceptíbeis de ser difundidas no portal Xeración D, colaborar naquelas actuacións e iniciativas que se poñan en marcha no seo do pacto e difundir os programas que se impulsen.

Membros do pacto

Actualmente o pacto confórmano 85 entidades tanto públicas como privadas, no sector público destacan, a nivel nacional os Ministerios de Traballo, Educación, Ciencia e Innovación e o de Industria e Comercio, a nivel autonómico están representadas a maioría de comunidades a través das súas diferentes consellerías, no caso galego da Axencia para a Modernización Tecnolóxica de Galicia, a AMTEGA.

Tamén están representadas a Policía Nacional, SEPE, RTVE, diversas fundacións como ONCE, Telefónica, FUNDAE e a nivel privado empresas como Microsoft, Ibm, Sage, Oracle ou HP.

Daniel García, quixo destacar que “en canto a entidades empresariais aparecen colectivos de ámbito nacional como a COE, ATA ou CEPYME sendo a Asociación Boirense de Empresarios a única asociación empresarial de ámbito non nacional integrada a día de hoxe no pacto, feito que énchenos de orgullo e serve tanto de recoñecemento polo traballo realizado en favor da dixitalización das nosas empresas como de estímulo para continuar con esta liña de traballo”.

Outros artigos

Publicidade

Revista en papel

Opinión

“A vivenda” – José Manuel Pena

“A vivenda” – José Manuel Pena

É un ben de mercado para o negocio particular ou un dereito básico, fundamental e humano, como pode ser a educación, a sanidade, a prestación por desemprego ou a xubilación? A vivenda, en Galicia e no resto de España, continúa sendo un negocio e un ben de...

“A forza da gratitude”. Luís Celeiro

“A forza da gratitude”. Luís Celeiro

Daquela, hai algo máis de cincuenta anos, algúns dos aldeáns e aldeás das aldeas de Lugochegaban ao Instituto para abrir as portas do futuro, pechadas a cal e canto para os fillos daMariña, para os das montañas da Fonsagrada, dos Ancares, do Courel e da Lóuzara...