O petroleiro ‘Minerva Nonou’, de bandeira maltesa e 254 metros de eslora, permanece parado a 28 millas da costa galega, fronte á ría de Vigo, mentres intentaba reparar unha hélice. Desde Salvamento Marítimo advirten de que o barco navega sen carga e avisan de que tivo problemas cunha hélice o pasado 9 de marzo, aínda que ten motor.
Tras saír de Xibraltar o pasado 7 de marzo, a embarcación decatouse da avaría da hélice fronte a Galicia e polo momento non ten establecido porto de destino á espera das citadas reparacións. Salvamento, que mantén vixiado o barco, informou de que aínda non está en territorio español, polo que só se prevé reparar a hélice e continuar o seu rumbo.
En caso de entrar en augas españolas, as mesmas fontes informan a este diario, “Capitanía Marítima esixiu unha serie de condicións”, que non foron reveladas. Insisten en que o barco está baleiro, polo que o único aceite a bordo é o combustible do propio barco.
