Cun vento do NW duns 12 – 15 nós deuse a saída á frota do quinta manga da liga de Cruceiros Ria de Arousa 2023. Unha baliza de desmarque na enseada pobrense era o preludio a unha loita sen cuartel polo interior da Ría, con pasos obrigados polas balizas de Moscardiño, Ter, illa de Rúa e Ostreira para a clase Cruceiro, para un total de 11 millas e un tramos a maiores entre o Moscardiño, Seixo e Ter ata cumprir as 13,40 millas para as clases Cruceiro e Cruceiro-Regata.
Na cabeza da frota unha bonita pugna polo liderado da clase regata entre Santana ́s, o Moucho e o Chispetrén, que se disputaban o podio nesta rifada clase. O Santana ́s, de José Manuel Millán, fíxose unha vez máis co primeiro posto e alisa o camiño para a vitoria final. Segundo é o ribeirense Moucho, pero só un punto sepárao do representante do CN Arousa Norte, Chispetrén, e xogaranse na etapa de Vilagarcía o segundo e terceiro posto da clase Regata.
Entre os Cruceiro-Regata segue o particular duelo entre o Cámping Ria de Arousa e o Fixius, que nesta ocasión foi parar a mans do pobrense José Manuel Pombar e o seu Ro 330, deixando así todo por decidir para a definitiva manga. Terceiro nesta clase para o ribeirense A Píllara.
O Orlando, de Gerardo Sánchez-Brunete, do CN Arousa Norte, segue sen dar o seu brazo para torcer e conta con outro primeiro no seu marcador particular, catro vitorias de cinco mangas disputadas falan por si só do poderío deste Dehler 31 e da súa tripulación. Segundo posto para o Galopín do CND de Ribeira e terceiro chanzo do podio para o pobrense Thor II.
O próximo 1 de abril definitiva manga desta Liga de Cruceiros Ria de Arousa en augas de Vllagarcía baixo a organización do centenario RCR de Galicia, con aínda moito por decidir. Na previa desta regata gardarase un minuto de silencio en recordo de Chuco Pérez-Lafuente, oficial, xuíz e adestrador recentemente falecido.
