O Concello de Lousame vén de pavimentar catro viarios na aldea vella de Gandarela, nos que investiu 38.023 euros. Trátase, en palabras da alcaldesa, Teresa Villaverde, “dunha das pequenas actuacións que estamos acometendo por todo o municipio para ir mellorando pouco a pouco a accesibilidade e o interior das nosas aldeas, como as que se fixeron en Vilar ou como as que se van facer en Burzó ou en Pousada”.
No caso de Gandarela, a actuación realizada esta semana permitiu mellorar catro viarios de acceso á localidade, que suman un total de 240 metros de lonxitude e cun ancho común de catro metros, con cinco centímetros de saburra e quince de formigón, intercalando franxas de lastras (adoquíns). A maiores, mellorouse con aglomerado en quente un treito de 90 metros de longo por 5 de ancho.
As obras foron acometidas pola empresa Excavaciones Yoni Tuñas SL foron adxudicadas por 38.023 euros o pasado 24 de febreiro. Uns traballos incluídos no Plan Complementario do POS+2022, que tamén inclúe a mellora dos accesos a Camboño (67.467,31 euros), Burzó e costa da Escabia (48.399,73 euros) e Baudeles (30.000 euros).
