O Concello de Boiro informou do remate das obras destinadas a completar a urbanización da rúa Pesqueira en Cabo de Cruz, unhas actuacións que forman parte do proxecto de urbanización das rúas Tenencia e Pesqueira e que se leva a cabo mediante o financiamento da Deputación da Coruña mediante o Plan Único (POS+2022) por importe de 98.555,73 euros.
O alcalde, José Ramón Romero, acompañado do tenente de alcalde, Luis Ruíz, e a concelleira María Outeiral visitou a rúa Pesqueira para coñecer o resultado final da execución das actuacións. As obras consistiron na execución dunha nova rede de recollida de pluviais que se completaron coa execución dun pavimento de lastros de granito e lousas de pedra.
O alcalde, José Ramón Romero, mostrouse moi satisfeito co resultado final das actuacións que “supoñen unha gran mellora neste núcleo que da servizo aos veciños da zona e tamén aos comercios locais que se atopan nesta zona de Cabo de Cruz”.
