O Concello da Pobra comezou a semana poñendo en valor os importantes recursos que se mobilizan cada ano para preservar unha das grandes xoias patrimoniais da vila: o Museo Valle-Inclán.
Así, tralas inclemencias meteorolóxicas do outono e do inverno, a torre de Bermúdez, sede do dito museo, foi obxecto dunha serie de tarefas de mantemento no granito e madeirames, segundo explicou este luns 6 de marzo a concelleira da Cultura, Patricia Lojo (PSdeG-PSOE).
O Concello executou unha intervención no paramento perimetral da parte baixa do edificio para a eliminación da colonización biolóxica. Unha empresa especializada realizou a limpeza de xeito manual co material idóneo para a retirada da vexetación sen danar a pedra. Deseguido, aplicouse un biocida como tratamento preventivo, tanto nas paredes coma no chan, para atrasar o florecemento de liques ou musgos.
A maiores, actuouse nos sollados de granito da contorna, así como no chan e escaleiras do patín.
Doutra banda, procedeuse co cambio de cinco fiestras de madeira que presentaban unha deterioración e aplicóuselles vernices para o exterior.
O investimento total supera os 5.000 euros.
