O BNG segue mantendo o seu apoio incondicional á veciñanza de Corrubedo, nas súas reclamacións para conseguir atención médica a tempo completo no seu centro de saúde, situado na Casa do Mar. Este xoves 23 de marzo os concelleiros do BNG Luís Pérez e Cruz Rivadulla instaron ao Goberno local a “implicarse para resolver o colapso e a precarización do sistema público de saúde en Corrubedo e tamén en Ribeira”.
Desde a formación critican que o Goberno local “estea desaparecido e calado ante a falta de profesionais médicos en Corrubedo e Ribeira”. E engaden: “Está claro que mentiron cando dixeron que solucionarían a falta de médico porque o único que fixeron foi estar de brazos cruzados mentres a atención sanitaria se deteriora máis con cada día que pasa”.
Porén, esgrimen que o modelo dos nacionalistas pasa por “dotar a Atención Primaria do persoal sanitario suficiente: persoal médico, de enfermería e de servizos”, de aí que agrupación recolla un plan “reter e captar profesionais, con condicións atractivas para as formadas aquí e para que retornen as que marcharon fóra”. Tamén se propón blindar por lei o financiamento necesario da atención primaria para que reciba, cando menos, o 25% do total dos recursos destinados á sanidade, “como recomenda a OMS, fronte ao actual 11,6% que sitúa a Galiza por debaixo da media”, explican.
E conclúe o portavoz do grupo den Ribeira, Luís Pérez Barral: “Desde o BNG propoñemos unha atención primaria atenta ás necesidades da poboación, defendendo un sistema sanitario público e forte que nos iguale ante a enfermidade, porque non pode seguir quedando atrás no coidado da xente, precisamos unha sanidade pública libre de recortes e privatizacións, que lle achegue á veciñanza a certeza, a tranquilidade e a confianza de que van ser coidados como se merecen ante a enfermidade”.
