O Concello de Noia celebrou con diversas actividades a conmemoración deste 8 de marzo, Día Internacional da Muller.
Na tarde deste mércores desenvolveuse no Coliseo Noela unha actividade de homenaxe a algunhas das mulleres que se dedicaron ao ensino na vila noiesa. “Foi un acto no que se recoñeceu o seu importante labor no eido da ensinanza”, lembraron dende o Concello a respecto dunha cita conmemorativa na que todas as persoas asistentes puideron gozar das interpretacións musicais de Inés Carreño, previa lectura da declaración institucional do 8 de marzo.
As actividades do Coliseo Noela foron organizadas pola Concellería de Servizos Sociais en colaboración co Centro de Información da Muller (CIM) de Noia, ao abeiro do Pacto do Estado contra a Violencia de Xénero.
Previamente foi lanzada nas redes sociais do Concello unha mensaxe na que se convidaba deste xeito a facer fronte común contra a discriminación: “A igualdade de xénero é unha loita de todos, homes e mulleres. É reponsabilidade de todos. Hoxe, 8 de marzo, celebramos o Día Internacional da Muller”.
