A Concellería de Deportes do Concello de Noia que dirixe Laura Salgado vai habilitar os días vindeiros un circuíto pump track no Parque de San Lázaro de Noia. O equipamento deportivo estará instalado dende o 31 de marzo até o 11 de abril, a disposición das seareiras e dos seareiros dos deportes urbanos nas modalidades (principalmente) de bici, scooter, patíns ou skate.
O sábado 1 de abril, na misma pista, terá lugar a Pump Track 2023 Speed Ring Contest, organizada por Vella Escola. Trátase dunha competición de velocidade contrarreloxo para varias modalidades: BMX, Scooter, Skate e Roller. Poderán participar persoas de todas as idades. Máis información e inscricións na web da Vella Escola.
Pump track
O pump track é unha modalidade deportiva que ten as súas orixes na práctica coñecida como BMX, que é un tipo de ciclismo vencellado ás acrobacias e que se practica co tipo de bicicleta de bicicleta que leva o mesmo nome (con rodas de 20 polgadas de diámetro). As primeiras pistas construíronse en Australia e Estados Unidos no ano 2000. Desde entón continuou a súa expansión por todo o mundo.
Un pump track é tamén un circuíto, xeralmente de pequenas dimensións, o cal se pode percorrer completamente cun monopatín ou cunha bicicleta, vehículos que tiran proveito da inercia proporcionada polos saltos ou peraltes do propio circuíto.
