O Concello de Ribeira adxudicou este mércores 29 de marzo deseño e instalación de dúas marquesiñas singulares na avenida do Malecón. Concretamente, na rotonda que conflúe coa rúa Romero Ortiz e á altura da rúa Rosalía de Castro.
A empresa adxudicataria resultou Proxectos e Instalación de Material Urbano, S.L., comportando un investimento de 25.410 euros, IVE incluído.
Por outra parte, adxudicouse tamén, con carácter definitivo, a instalación dunha varanda separativa entre o Malecón e á zona portuaria. Estará feita de aceiro inoxidábel, formada por dúas seccións: unha de 200 metros de longo e 90 centímetros de altura no tramo comprendido entre Rosalía de Castro e a nova parada central de autobuses e a outra de 52,5 metros de longo e 50 centímetros de altura ata a rotonda na que desemboca Romero Ortiz, estrutura esta última na que se intercalarán pasos para acceder ao recheo de Portos.
Neste caso a actuación recaeu en Juan José Pacheco Revuelta (Talleres Birlongo) por un importe de 50.578 euros, IVE incluído.
