O Concello de Ribeira informou do inicio dos traballos para a construción do novo Espazo Urbano Municipal na zona de Fontán, nas inmediacións do paseo do Touro e da Comisaría da Policía Nacional. A actuación está sendo executada pola empresa Obras y Viales de Galicia, S.L., comportando unha inversión de 142.420 euros, IVE incluído.
A nova infraestrutura está destinada a satisfacer “unha ampla demanda xuvenil”, segundo explicaron fontes do Consistorio, engadindo que contará cunha área de 432 metros de superficie no que practicar especialidades como skate, bmx, roller ou scooter.
O parque estará construído sobre unha base de formigón gunitado cunha zona de rúa e outra de rampla que estará integrada na paisaxe, “constituíndo ademais unha aposta por un urbanismo inclusivo”, engadiu o Concello, sinalando que disporá de diversos elementos que darán as delicias dos afeccionados aos deportes urbanos: pirámide, duna, hip, miniramp, corner, etc…
Completarán a intervención a colocación de papeleiras, bancos, aparcabicis e instalación das columnas e proxectores.
O proxecto foi redactado por Daniel Yábar, prestixioso arquitecto alacantino especializado neste tipo de instalacións, responsábel de actuacións como o Skatepark de Santa Lucía en Vitoria, a Skateplaza de Logroño, o Skatepark Parque de la Granja en Tenerife ou o Bowl Vía Hispanidad de Zaragoza.
A nova área deportiva emprazarase sobre unha parcela municipal de 480 metros cadrados situada en Fontán, a 200 metros do Paseo Marítimo do Touro e na contorna da nova Comisaría e do novo Punto de Encontro Familiar.
O prazo de execución son tres meses.
