O grupo de Ribeira Boroa, vén de sacar novo traballo, O´ Clásico Fol, liderado por Sabela Olivares na gaita, piano, pandeireta e voz acompañada por Suso Bello á guitarra e voz e Alberto Millán ao baixo.
A banda, que tamén forma parte da Companhia do Ruído, trae desta volta un proxecto que ten como eixo central á gaita adaptada ás novas tecnoloxías destes tempos que corren.
Boroa crea un mundo sonoro coa gaita como protagonista alén de fronteiras para achegarnos harmonías de diferentes xéneros musicais pasados polo filtro acústico: folk tradicional galego, swing, jazz manouche, ragtime… Nesta viaxe con Boroa experimentaremos coa música contemporánea, o cinema, ou a potencia sonora e a velocidade da música bretoa e irlandesa.
Segundo informan dende a formación ribeirense, ao escoitar O` Clásico Fol atoparémonos co folk máis galego e coa formación clásica da autora, que unha vez levada ao directo convértese nun espectáculo que combina pezas para o baile e un potente fin de festa cunha escolma da música contemporánea galega.
