Este venres 24 de marzo o Concello da Pobra compartiu detalles do proxecto de rexeneración que impulsou na Ribeiriña co apoio do Goberno central, unha iniciativa de posta en valor ambiental e paisaxística que se desenvolve na contorna trala recuperación por parte do Ministerio para a Transición Ecolóxica e o Reto Demográfico dos terreos de dominio público marítimo terrestre concesionados no seu día ás fábricas La Onza de Oro e Hadasa.
A subdelegada do Goberno na Coruña, María Rivas; o alcalde da Pobra do Caramiñal, Xosé Lois Piñeiro (Nós Pobra); a concelleira das Relacións Institucionais, Patricia Lojo (PSdeG-PSOE); a concelleira dos Servizos Municipais, Estefanía Ramos (Nós Pobra); e o xefe da Demarcación de Costas, Rafael Eimil; achegáronse ata o lugar para comprobar o avance dos traballos que complementan a actuación iniciada no 2011 co derribo da nave de La Onza de Oro.
Financiada con fondos do Plan de Recuperación por un importe preto dos 800.000 euros, a nova fase do proxecto busca reverter ao seu estado natural unha superficie de aproximadamente 5.500 metros cadrados. Para acadar tal obxectivo, as tarefas comprenden a demolición da explanada, escolleras e ramplas, cun prazo de execución de arredor de oito meses, polo que concluirán no verán. O proxecto contempla tamén unha senda litoral integrada na paisaxe que sirva como transición entre a costa e os núcleos de vivendas próximos.
Esta obra inclúese na segunda fase do plan de actuacións do Ministerio cara a recuperación do dominio público marítimo terrestre na provincia da Coruña.
Rivas destacou a importancia de “suprimir elementos cun impacto negativo para así poñer en valor a zona”. Engadiu que esta acción “permite ver como o Plan de Recuperación está chegando a cada unha das cidades e pobos da nosa provincia.”
Con relación á planta de Hadasa, o rexedor aclarou que “non se derruba agora”, pois é propiedade privada, se ben “o empeño do Concello é a eliminación desta estrutura, principalmente, por cuestións de seguridade”. Segundo explicou, ao tratarse de solo rústico de protección de Costas, só poderán actuar fóra da liña de servidume e presentando un proxecto que redunde en beneficios para o lugar.
