O Centro Social de Boiro (no número 1 da rúa Manuel María) acolle este mércores 22 de marzo unha charla con información e recursos de utilidade para as persoas que estean ao cargo de dependentes e precisen, tamén, mellorar a calidade do seu traballo e a súa propia calidade de vida.
A charla Coidado da persoa coidadora dará comezo ás 17.00 horas (até as 19.00 horas), e ten as inscricións abertas a través da conta formacion@agadea.org. A sesión será impartida por Martina González Veiras, educadora social do Centro de Día de Ribeira.
Trátase dunha actividade promovida por AGADEA Alzhéimer ao abeiro do acordo que mantén co Concello de Boiro, destinado a fortalecer os servizos da asociación no termo municipal e a crear o marco idóneo para xerar divulgación, intercambio de coñecemento e capacitación no ámbito dos coidados e a atención.
