A organización de Os Cen do Barbanza ultima a revisión dos percorridos da proba

Neste punto de inflexión entre o inverno e a primavera, os organizadores da proba Os Cen do Barbanza traballaron arreo para revisar e preparar os percorridos. Ao mesmo tempo que desenvolveron este traballo destacaron o gran engadido deste acontecemento deportivo: “Esta ultratrail ten como valor engadido a paisaxe onde se organiza, con mámoas, castros e cruceiros propios da tradición galega”. Os trekkers remataron xusto antes do inicio da primavera as tarefas de adecuación dos camiños.

Ademais, no Facebook da proba (www.facebook.com/itrekkers/) podemos ver diversos vídeos dos seareiros dos deportes de montaña nos que salientan os tesouros ambientais, paisaxísticos e patrimoniais polos que discorre Os 100 do Barbanza, por exemplo ríos, soutos, castros, cumios ou viñedos.

Os Cen do Barbanza

Boiro será o anfitrión da oitava edición da proba deportiva Os 100 do Barbanza que organizan os International Trekkers de Barbanza e Sar e que se celebra este ano os días 24 e 25 de xuño de 2023.

Os 100 do Barbanza é unha proba de trail de 100 quilómetros que se realiza en 24 horas e que este ano forma parte da Liga de Sendeirismo de Galicia e da Liga Ibérica. É unha proba de ultrafondo e ultradistancia das máis importantes do territorio nacional, e que supón un desafío persoal e deportivo”, recoñeceu o presidente da entidade International Trekkers de Barbanza e Sar, Francisco Alcalde.

A historia desta proba, que pasa polos concellos de Boiro, A Pobra, Ribeira, Porto do Son, Noia, Lousame e Rianxo, remóntase ao ano 2014 e naceu co obxectivo “de dar a coñecer lugares senlleiros dos municipios, recuperar camiños esquecidos e tamén promover a paisaxe, a gastronomía, o turismo e a cultura da comarca”.

Segundo fixo saber o director técnico dos International Trekkers, Xavier Boullón, o percorrido de 100 quilómetros deste ano pasa por un total de 25 parroquias dos 7 concellos e conta cunha subida acumulada de 2.600 metros. “Trátase da única proba de 100 quilómetros que se celebra en España e que ten detrás un gran esforzo e implicación de todos os concellos polos que transcorre”, afirmou Laura Lado, vogal de sendeirismo da Federación Galega de Montañismo engadindo que se trata dunha importante cita deportiva non competitiva e cun máximo de 300 inscricións.

As inscricións para participar na VIII edición de Os 100 do Barbanza poden facerse a través da páxina web www.itrekkers.org.