A Marea de Noia volveu emitir un comunicado crítico co Concello en relación á reforma da Praza de Abastos. O comunicado ten o seu precedente directo no pleno da Corporación municipal do pasado 23 de febreiro, cando se aprobou iniciar unha auditoría interna para valorar se os pagos efectuados con informe negativo da intervención municipal se corresponden coas certificacións da obra.
Dende o grupo municipal da Marea Cidadá de Noia indican estar “fartos de tanta mentira e escuridade neste procedemento” e tamén que “pedimos a copia do expediente e 20 días despois non se nos facilitou”. E engaden: “Estamos falando dunha obra de máis de un millón de euros que debería terse executado con todas as garantías e seguindo a normativa en materia de contratación”. O grupo di que o devandito trátase “dun sintoma de mala xestión do Goberno de Santiago Freire, mais preocupado por saír ben na foto de precampaña que por xestionar con rigorosidade os fondos municipais”.
Indican que de “non resolverse esta situación” iniciarán accións xudiciais contra o alcalde e “que sexa a xustiza, ante os diversos atrancos que esá poñendo o Goberno municipal para facilitar a documentación, quen delibere se se está actuando conforme a normativa ou non”.
Manolo Seijas indicou que “non é habitual que non se facilite a documentación requirida dende o Concello, nunca se fixo, polo que estamos ante un feito sen precedentes”. E mentres tanto, engaden dende a Marea Cidadá de Noia, “a obra segue paralizada”. O comunicado conclúe lembrando “que os informes da auditoría interna, que deberán emitir a secretaria municipal, a interventora, o director de obra e os servizos de urbanismo, deben entregarse antes da vindeira semana”.
