Será este domingo, 2 de abril, ás 18 horas cando teña lugar unha sesión de contacontos no auditorio da Casa da Cultura de Lousame. Máis polo miúdo, para asistir a este encontro encamiñado a nenas e nenos de 2 a 8 anos cómpre inscribirse sen custo ningún nesta web até completar o aforo de 110 prazas. Indo ao espectáculo en cuestión, trátase de Contos do animalario, unha entretida viaxe da man da contadora Vero Rilo que levará á rapazada polos montes, prados e camiños máis verdes que existen, onde se atopa cos animais máis marabillosos: toupas choscas, chivos enormes e ogros torpes, pombas doces e dragóns atroces, bechos estraños, cabalos azuis e cantigas de fai anos e non tantos. Vero Rilo é narradora oral e leva dende 2013 contando contos e historias de vida para todo tipo de público. Unhas historias nas que a música adoita estar moi presente.
