A campaña da sardiña empeza este luns e a conselleira do Mar, Rosa Quintana, espera que sexa “un moi bo ano” porque o recurso atópase “moitísimo mellor que nos maiores anos de explotación”.
Así o sinalou a preguntas dos xornalistas durante un acto en Porto do Son onde aproveitou para reivindicar que Bruxelas adopte decisións con base en datos científicos.
Ao seu xuízo, o estado da sardiña “é unha mostra máis dos despropósitos que levan á Comisión para tomar decisións equivocadas”, debido a que en 2018, segundo lembrou, expuña un período de veda de 15 anos.
Deste xeito, recalcou que esta é “unha mostra máis de que hai que ter datos científicos e adoptar os plans de xestión para manter actividade e o recurso ao mesmo tempo”.
