Un barco bateeiro rescatou aos membros da tripulación; un deles presentaba dor nunha perna, aínda que acudiría ao centro sanitario polos seus propios medios unha vez de volta en Cambados, onde ten base o seu armador.
A Policía Local da Pobra do Caramiñal, á súa vez alertada por un particular, informou ao 112 Galicia dos feitos instantes antes das 10:30 horas. Os axentes estaban na zona do Maño, e observaban ás tres persoas implicadas sobre o casco do barco pesqueiro, que quedara coa quilla ao sol a unha distancia considerable da liña de costa e que remataría por afundir.
En cuestión de minutos, un bateeiro que navegaba pola zona conseguiu rescatar á tripulación.
Un dos seus membros queixábase de dor nunha perna, polo que foi transferido a un barco de rescate de Salvamento Marítimo. Ao mesmo tempo, o 112 Galicia solicitaba a colaboración de Urxencias Sanitarias de Galicia-061 para prestarlle asistencia unha vez en terra, o que non foi necesario: sería finalmente trasladado a outra embarcación, propiedade do seu armador, que se encargaría de levalo de volta a Cambados.
O ferido indicou que acudiría polos seus propios medios ao centro hospitalario.
Desde o 112 tamén se informou para este operativo ao Servizo de Gardacostas de Galicia, á Garda Civil e á Agrupación de Voluntarios de Protección Civil da Pobra do Caramiñal.
