O Boletín Oficial do Estado (BOE) publicará nos vindeiros días a resolución pola que se estabelece un perìodo de parada vontaria na pesqueira do xurelo para a frota de cerco e para determinados barcos de artes menores. A resolución concreta que estas paradas terán un período mínimo dun mes e máximo de tres meses. Esa limitación da actividade poderá compensarse cunha axuda económica por paralización temporal no marco do Fondo Europeo Marítimo da Pesca e da Acuicultura (FEMPA) e da normativa de desenvolvemento en España, que percibirán tanto as empresas como os tripulantes.
Con esta medida -considerada insuficiente polo sector- o Goberno entende que cumpre o seu compromiso de apoio á frota pesqueira afectada polo peche da pesqueira do xurelo debido á súa delicada situación.
Como se lembrará, a Unión Europea e o Reino Unido acordaron o pasado mes de decembro unha redución do 78% na cota de xurelo para o ano 2023 no Atlántico Noroeste, que só se poderá capturar como pesca accesoria, precísamente a causa desa precaria situación.
O Consello Internacional para a Exploración do Mar (ICES) recomendou un Total Admisible de Capturas (TAC) “cero” para este ano. Amáis, a esixencia de que os buques teñan unha dependencia das capturas comercializadas igual ou superior ao 18% nos últimos tres anos, conforme aos datos de que dispoña a Secretaría Xeral de Pesca.
Son un total de 86 os barcos que poderán beneficiarse destas axudas, distribuidos entre as distintas comunidades autónomas: 71 en Galicia, 8 en Cantabria, 4 no País Basco e 3 en Asturias.
A xestión e pagamento das axudas estará a cargo das comunidades autónomas, que deberán realizar as correspondentes convocatorias, previa territorialización dos fondos correspondentes, que serán acordados na Conferencia Territorial de Pesca.
A Federación Galega de Confrarías de Pescadores coida que había a intención “de facelo o millor posible, pero a resolución non é a solución ao problema- Co que se da -afirma José Antonio Pérez, presidente da Federación Galega de Confrarías- non da, si non sacan as cotas da Seguridade Social.Así non se da unha solución boa ao problema de non poder pescar xurelo”.
José Antonio Pêrez afirmou a este xornal que o racú ten, nas costas galegas, unha dependencia de entre un 40 e un 45%, o que fixo que a cota repartida por barcos non superara os 6 quilos á semana. Cantidade que, sinalou tamén un armador afiliado á asociación ACERGA “non da nin para unha sardinada familiar”.
Por este motivo, os armadores integrados en ACERGA consideran que as axudas estatais deberan entregarse durante todo ano porque a pesqueira está nunha situación “calamitosa”, especialmente os cerqueiros pequenos, que non teñen capacidade para ir pescar “arriba” (a augas do País Basco). Existe a crenza de que “a frota pequena vai caer toda, porque o caladoiro está machacado, Non se respectaron topes, pescouse todo canto xurelo entraba nos copos e agora todo vai depender da resposta que nos dean a xarda e a sardiña. Culpa nosa en boa medida, compartida coas autoridades pesqueiras que non saben ou non queren aplicar medidas correctoras que nos permitan programar a nosa actividade con xeito”.
