O departamento de Servizos Sociais do Concello de Boiro fixo balance das novas incorporacións locais ao servizo de teleasistencia da Deputación da Coruña durante o ano 2022. Segundo fixo saber a área que dirixe o concelleiro Raúl Treus, en Boiro contabilizáronse 26 novas altas no dito servizo no devandito período. Polo tanto, este programa provincial superou xa o medio cento de usuarios activos no concello, “converténdose nunha ferramenta útil, sinxela e áxil para dar apoio a persoas maiores e ás súas familias”, explicou o concelleiro.
Este programa de teleasistencia está baseado na entrega dun colar-avisador para empregar en casos de emerxencia e dun seguimento activo de chamadas telefónicas. A maiores deste servizo, dende o ano 2022 púxose tamén a disposición das persoas usuarias que así o demanden un reloxo-GPS.
A teleasistencia é un programa da Deputación da Coruña que ofrece a posibilidade de exercer un seguimento activo aos nosos maiores. “As familias agradecen infinitamente a tranquilidade que lle aporta este servizo ao saber que os maiores estarán atendidos en todo momento en caso dunha emerxencia”, sinalou o concelleiro de Servizos Sociais, Raúl Treus.
Todas aquelas persoas interesadas en darse de alta ou pedir máis información sobre o servizo poden facelo no departamento de Servizos Sociais ou mediante o enderezo electrónico s.sociais@boiro.org
