O Concello de Santiago editou este mes de febreiro o libro Un paseo singular por Compostela, que recolle dous textos do escritor e xornalista pobrense Victoriano García Martí, nos que converte a Rosalía de Castro en guía turística da cidade. A publicación foi dada a coñecer pola concelleira de Acción Cultural, Mercedes Rosón, acompañada pola autora, Arantxa Fuentes Ríos, profesora da Facultade de Filoloxía da USC.
O libro, publicado en castelán e en galego, vén cunha tirada de 1.000 exemplares. A guía inclúe unha breve biografía de García Martí e o trazado dos correspondentes roteiros pola Compostela monumental. “Con esta obra, dunhas 40 páxinas, continuamos recoñecendo a figura de Victoriano García Martí, humanista, escritor e defensor de Galicia, ao que xa homenaxeamos hai algo máis dun ano, o 22 de xaneiro de 2022, cando colocamos unha placa, lembrándoo, na casa na que viviu, aquí en Santigo de Compostela”, indicou a concelleira de Acción Cultural.
Nas páxinas “unifícanse a querenza que García Martí profesou pola cidade de Santiago de Compostela, á que adicou numerosos ensaios e artigos, coa que profesou pola figura rosaliana”, sinalou citando o texto de Arantxa Ríos.
Mercedes Rosón animou a toda a veciñanza de Compostela a percorrer estes dous roteiros, que se suman “aos numerosos paseos que nos ofrece Santiago: literarios, feministas, artísticos, etc., que xa presentamos, aquí, noutras ocasións”.
Da obra fíxose unha edición de cincocentos exemplares en galego e outros tantos en castelán, que están dispoñíbeis na oficina de Turismo de Santiago e na Zona C, na praza de Cervantes. A edición desta obra únese a outras accións e actividades programadas pola concellaría de Acción Cultural con motivo do día de Rosalía de Castro, que se celebra o 23 de febreiro, e que se presentarán en datas vindeiras.
A autora agradeceu a colaboración do Concello na publicación e salientou que esta obra “é un paso máis aló no rescate da figura de García Martí, esquecida durante anos”.
Da publicación, Arantxa Fuentes destacou o texto no que García Martí, “colle literalmente a figura de Rosalía de Castro e ficcionalízaa, converténdoa nunha guía turística. Unha proposta turística de homenaxe á escritora e de difusión dos seus versos, moi moderna para a época”.
A autora
Arantxa Fuentes Ríos é profesora na Universidade de Santiago de Compostela e especialista en Literatura comparada e Teoría da Literatura. A raíz do seu labor investigador rescatou do esquecemento a figura de Victoriano García Martí, do que publicou diversos traballos científicos. Destaca o libro Por los caminos del siglo XX. Obra periodística olvidada (1914-1963) de Victoriano García Martí, publicado por Alvarellos e o Consorcio de Santiago.
