O espírito festeiro, creativo e aberto será o gran protagonista do Entroido en Porto do Son, cuxo programa, ateigado de propostas para persoas de todas as idades, foi dado a coñecer pola área de cultura e festexos do Concello. As actividades concentraranse os días 18, 20, 21 e 22 de febreiro e comezarán, o día 20, cun concurso infantil de disfraces (categorías grupo, parella e individual), amenizado pola Charanga Os Celtas. A cita será na fachada marítima da vila de Porto do Son, ás 17.00 horas, onde terá lugar o desfile ante o xurado habilitado para valorar as diferentes propostas. Os mellores disfraces de individual e parella serán nomeados Rei e Raíña infantís do Entroido, e deberán encabezar o desfile do luns. Haberá premios de entre 50 euros e 150 euros (unha ducia de premios).
O 20 de febreiro celebrarase o concurso de adultos. Haberá tres modalidades: comparsas, grupo e individuais. O certame estará amenizado por Psychodelia de Troula e os Solfamidas de Campo Lameiro. O desfile sairá da Casa da Cultura de Porto do son ás 17.00 horas, facendo un percorrido polas rúas da vila até a fachada marítima, onde terá lugar a actuación. As comparsas deben representar a murga e os grupos e individuais realizar unha exhibición. Haberá unha decena de premios en metálico, que oscilarán entre os 800 euros e os 50.
As actividades do Entroido volven ao día seguinte, 21 de febreiro, desta volta poñendo o foco na rapazada, con inchábeis a partir das 17.00 horas no Polideportivo de Santa Irene.
O día seguinte, 22 de febreiro, celebrarase o tradicional Enterro do Felipiño. A saída será ás 19.30 horas da Casa da Cultura de Porto do Son. A comitiva percorrerá as rúas do centro histórico do Son até o Tendedeiro, na fachada marítima.
As inscricións nos certames haberá que facelas até o 16 de febreiro no Rexistro do Concello de Porto do Son ou en portodoson.gal.
