O Concello de Boiro celebrou este martes día 21 de febreiro o tradicional desfile de Entroido polo rueiro da vila e máis concurso de disfraces e carrozas con modalidades de individual/parellas, grupos e carrozas. O desfile arrincou ás 18.00 horas e percorreu a rúa Peonil ata a praza da Mancomunidade e continuou por Salvador Allende e a rúa Principal de regreso até a céntrica praza de Galicia, onde tivo lugar a entrega de premios.
En total rexistráronse 9 participantes na categoría individual/parellas, 8 na categoría grupo e 5 en carrozas.
O xurado estivo composto por María Outeiral, concelleira de Cultura; Manola Ferreirós, técnico de Cultura; Lupe Tubío, de Cáritas Boiro; e Conchi Carro, da Asociación Xilbarbeira.
Na categoría individual o primeiro premio, dotado con 300 euros, foi para Historia das dúas Marías; o segundo, con 200 euros, para Damiselas de papel; o terceiro premio, de 150 euros, foi para Bajo el mar e o cuarto premio, de 100 euros, para A charca dos ghansos.
Nos grupos o primeiro premio, de 600 euros, foi para Os mouchos saen de día; o segundo premio, de 300 euros, para Inventos locos de Sergio; o terceiro premio, de 250 euros, para As lavadoras en loita; e o cuarto premio, de 200 euros, para Os espantallos.
Na categoría de carrozas o primeiro premio, dotado dunha cantidade de 1.200 euros, foi para A casa de crochet, o segundo premio, de 800 euros, para Paraíso de África; e o terceiro premio, de 500 euros, Moulin Rouge.
O desfile estivo amenizado polo espectáculo Pyscoldelia de Troula, o grupo Latexo Percusión, e os grupos tradicionais As da Boina, A Dorniña de Abanqueiro e Nunca é Tarde. A festa rematou na Praza de Galicia con DJ Matrek e a entrega de premios por parte do xurado e o tenente de alcalde, Luis Ruíz.
