O Concello de Ribeira decidiu prolongar por un período de 16 días a súa campaña Amaribeira. Fíxoo “en apoio ao comercio e a hostalería local”, de tal xeito que aquelas persoas que non consumiron ao cen por cen os seus bonos de desconto teñan a oportunidade de facelo.
Así, entre o luns 13 e o martes 28 de febreiro, habilitarase a opción de utilizar estes bonos QR nos 141 establecementos que se adheriron á campaña, lanzada por segundo ano consecutivo no pasado e decembro logo do éxito acadado na primeira edición, que, segundo informaron fontes do Concello, propiciou un volume de negocio superior aos 1,2 millóns de euros.
O Concello lembrou tamén que a presente campaña, con descontos de ata 30 euros por 90 de compra e na que a Administración local insuflou 255.000 euros procedentes do seu remanente de tesourería (máis outros 15.000 para o marketplace Ribeira Store), estivo activa ata o 31 de xaneiro. Agora decidiuse conferir un prazo extraordinario para permitir á veciñanza esgotar todas as posibilidades de sacarlle proveito.
