O Concello de Boiro, a través do departamento de Servizos Sociais, propón a realización de actividades dirixidas a sectores específicos da poboación. A proposta de actividades estaría destinada a persoas con diversidade funcional e outra de musicoterapia para persoas maiores.
Por unha parte prevese retomar o proxecto Universo Diverso que se paralizou por mor da COVID-19 e que ten como finalidade “achegar alternativas de ocio para persoas con diversidade funcional maiores de 16 anos”. Actividades que se realizarán atendendo ás necesidades de conciliación.
Por outra banda, o Concello de Boiro propón retomar tamén as actividades de musicoterapia destinadas a persoas maiores e que tamén se paralizaron a causa da pandemia. “Son dúas actividades que no pasado tiñan gran aceptación e queremos retomalas atendendo ás demandas da veciñanza, polo que abrimos un prazo de preinscrición para poder determinar os grupos e horarios”, afirmou o concelleiro de Servizos Sociais, Raúl Treus.
Para coñecer o interese nas actividades e poder conformar os grupos atendendo ás demandas e necesidades da veciñanza, o Concello de Boiro abre un prazo de preinscrición para mostrar o interese en participar nestas actividades. A solicitude de inscrición previa debe facerse no departamento de Servizos Sociais de Boiro ou no enderezo electrónico s.sociais@boiro.gal
