O BNG de Outes publicou un vídeo nas redes no que fai un chamamento directo ás veciñas e veciños para participaren na concentración convocada pola Confraría de Noia en contra da autorización de vertidos da mina de San Fins.
No vídeo, Anxo Núñez, responsábel local do grupo nacionalista, denuncia que a ría está en perigo pola autorización recibida pola Mina de San Finx para baleirar litros e litros de augas contaminadas que irían dar, directamente, “ao noso litoral”. Estes vertidos, di, “suporían poñer en risco máis de 1.500 empregos directos e máis de 5.000 empregos indirectos nos nosos concellos”. E prosegue: “Estas augas contaminadas de San Finx non están a seguir un proceso normal de vertedura, nin veñen acompañadas de controis eficaces sobre a súa depuración, e aínda por riba á empresa da mina non se lle obriga a facerse cargo dos posíbeis efectos medioambientais”.
A concentración convocada pola Confraría de Noia será o sábado 4 de marzo na Alameda da vila noiesa ás 11.00 da mañá.