Galicia é unha das comunidades pioneiras entre as integradas na iniciativa SONANDO LOCAL integrada no proxecto ONDA ODS coordinado por DMA-RTV e financiado polo Ministerio de Dereitos Sociais e Axenda 2030.
A nova significa un importante paso cara un obxectivo do que moitos radiofonista participamos vai anos na percura de lle dar pulo á información máis próxima e que, posteriormente, a Xunta de Galicia non so non apoiou senon que puxo evidentes atrancos para impedir que prosperara como foi o caso -mesmo xudiciais- postos en tempos de Núñez Feijoo á fronte do goberno autonómico e que obrigou á emisora comunitaria Cuac FM da Coruña a emitir sempre coa espada de Damocles eariba.
Agora, emisoras de radio galegas como son a Asociación de Emisoras Municipais Galegas (EMUGA-Radiofusión) e a Rede de Medios Comunitarios -que conta coa coruñesa Cuac FM como asociada e Radio Filispim e Radio Roncudo como colaboradoras- participan da iniciativa citada (Sonando Local) plataforma OTT de contidos audiovisuais desde a proximidade, organizada ao abeiro do programa Onda ODS que ofrece información en catro idiomas: galego, castelán, catalán e eúscaro, arredor dos retos globais contemplados na Axenda 2030.
Coa celebración o pasado 13 de febreiro do Día Internacional da Radio e desde o local en Europa, ofrécese información sobre os obxectivos de desenvolvemento sostible (ODS), labor no que toman parte asimesmo a Asociación de Emisoras Municipais e Comunitarias de Andalucía de Radio e Televisión (EMA-RTV) e RTV Cardedeu (La Xarxa).
Segundo información a este respecto facilitada polo Colexio Profesional de Xornalistas de Galicia (CPXG), os medios de proximidade teñen como prioridade incidir e sensibilizar á poboación sobre os retos globais aos que se terá que enfrontar a sociedade ao longo das próximas décadas: medioambiente, equidade de xénero, revitalización do medio rural, traballo digno ou loita contra as desigualdades, que son algúns dos eixos temáticos que vertebran esta plataforma a través da cal os usuarios poderán visualizar ou escoitar de balde materiais moi familiares por medio dos que se favorecerá a consecución dos 17 obxectivos de Desenvolvemento Sostible marcados na antedita Axenda 2030.
A rede Sonando Local tenta, polo tanto, promover o fortalecemento dunha alianza de máis de 300 medios locais -públicos e comunitarios- para que os problemas, retos e oportunidades que xiran arredor dos ODS sexan ampliamente coñecidos pola ciudadanía española.
Os retos globais da Axenda 2030 son : o fin da pobreza, fame cero, saúde e benestar, educación de calidade, equidade de xénero, auga limpa e saneamento, enerxía asequible e non contaminante, traballo decente e crecemento económico. En definitia, erradicar a pobreza, protexer o planeta e facer realidade os dereitos humanos de todas as persoas.
Un reto pouco doado, máis tamén un desafío que a sociedade debe asumir, especialmente na comunidade autónoma de Galicia onde, desgraciadamente, as diferencias están sumamente marcadas. Moitas veces, a lume.
