Na mañá deste martes 7 de febreiro celebrouse a entrega dos títulos de propiedade da parcelaria de Nebra, en Porto do Son. Co formalización desta entrega, na que participaron José González (conselleiro de Medio Rural) e Inés Santé (directora xeral da Axencia Galega de Desenvolvemento Rural), dáse por rematado este proceso de reorganización do territorio, no cal a Xunta investiu algo máis de 3,1 millóns de euros.
No acto, no que tamén participou o alcalde sonense Luis Oujo, o conselleiro destacou que se traballou nunha superficie de 610 hectáreas, propiedade duns 1.160 veciños. Así, pasouse de case 7.500 predios a unhas 2.500 parcelas, “o que supuxo que a superficie media por parcela se triplicase e pasarse duns 814 a 2.485 metros cadrados”, dixo, engadindo que “as parcelarias seguen a ser un dos mellores mecanismos para dar máis valor ás terras, á vez que permiten aumentar a base territorial das explotacións e reducir de xeito considerábel os seus custos de produción”. Por iso, apuntou, “as novas concentracións teñen unha concepción moderna da mellora das estruturas, orientadas a favorecer o desenvolvemento económico das explotacións”.
Tamén dixo que entre o ano 2020 e o que vai de 2023 “a Xunta rematou un total de 25 concentracións parcelarias, contando a de hoxe, que abrangueron unha superficie total de máis de 18.000 hectáreas, beneficiando preto de 12.500 propietarios que recibiron máis de 28.000 títulos de propiedade”.
