O Concello de Boiro saca a licitación o alleamento, mediante poxa pública, de vehículos non utilizábeis e abandonados, retirados e depositados no depósito municipal. Os pregos e condicións están dispoñíbeis na Plataforma de Contratación do Sector Público.
O obxecto deste contrato é sacar a poxa pública dous lotes, un formado por vehículos abandonados e almacenados no depósito municipal e outro lote formado por unha torre-grúa tamén achegada ao depósito municipal. “Trátase de vehículos que levan moitos anos en estado de abandono nunha parcela ocupando espazo e cun gran deterioro que requiren ser tratados”, afirmou o alcalde.
Trátase dun contrato patrimonial que ten por obxecto o alleamento mediante poxa pública de vehículos abandonados retirados polo Concello e almacenados no depósito municipal que teñen un tratamento de residuo sólido urbano. A finalidade deste servizo será a súa destrución, descontaminación e posterior baixa definitiva.
As empresas interesadas en participar deste contrato teñen ata o día 28 de febreiro para presentar as súas ofertas mediante a Plataforma de Contratación do Sector Público.
O Concello de Boiro dispón na actualidade cunha parcela acondicionada como depósito municipal de vehículos que reúne as condicións axeitadas para a custodia dos vehículos retirados e con capacidade para uns cincuenta vehículos. “Unhas actuacións que levamos a cabo tendo en conta a necesidade de dispoñer dun espazo que reunise as condicións axeitadas para o depósito e custodia de vehículos”, recoñeceu o alcalde, José Ramón Romero.
