Congalsa, empresa especializada en alimentación con sede na Pobra do Caramiñal (A Coruña), celebrou esta mañá no Pazo Torre de Xunqueiras a súa tradicional gala anual de presentación de obxectivos,
resultados e proxectos, á que acudiu a práctica totalidade do persoal. Trátase do primeiro evento deste tipo que se realiza desde 2020, pois nos dous últimos anos a gala tivo que cancelarse debido ás restricións sanitarias e de distanciamento social impostas pola pandemia.
Durante o acto, a empresa deu a coñecer os seus resultados económicos de 2022. Congalsa pechou o último exercicio cunha facturación de 132,3 millóns de euros, un 17% máis con respecto a 2021.
Xunto a isto, Congalsa fixo público o dato do volume das súas diferentes gamas de produto comercializadas ao longo do ano pasado, unha cifra que alcanzou as 30.000 toneladas. E tamén se destacou durante a gala que incrementou a súa porcentaxe de traballadores en case un 15% no último ano, ata alcanzar os 673 actuais.
Estas cifras inclúen os resultados da firma en Galicia, sumados aos da planta Sulpasteis, a compañía que Congalsa adquiriu en 2020 en Portugal.
Premio Ramón Doval
Do mesmo xeito que en galas anteriores, o acto desta mañá serviu para dar a coñecer os resultados do denominado Premio Ramón Doval ao traballador ou traballadora que mellor represente os valores corporativos da empresa: compromiso coa empresa, respecto polas persoas, orientación ao cliente externo e interno, eficiencia, integridade e ética empresarial, traballo en equipo, orientación á mellora continua, innovación, actitude positiva e orientación á sustentabilidade (económica, social e ambiental).
Trátase dun recoñecemento anual que cobra especial relevancia porque o gañador é escollido por todos os traballadores da empresa, nunha votación telemática interna levada a cabo durante o evento.
O premio, que leva o nome do anterior director de Relacións Externas da empresa, xa xubilado, foi instaurado en 2014 e alcanzou nesta ocasión a súa décima edición, na que resultou gañador Roberto Fernández Ageitos, traballador de mantemento, que leva 29 anos vinculado á empresa.
