Ricardo Suárez (BNG), Manolo Seijas (Marea) e Fran Pérez (PSdeG), solicitaron de novo este martes 7 de febreiro ao alcalde de Noia, Santiago Freire, que convoque o pleno extraordinario de inmediato para “poñernos a traballar e facer un recurso de alzada en condicións” contra a decisión de Augas de Galicia de autorizar os vertidos procedentes das minas de San Fins.
A nova solicitude por parte dos tres grupos da oposición noiesa chega despois de ter sido convocados
a unha xunta de voceiros ordinaria -que xa estaba prevista como cada mes- o vindeiro luns 13 de febreiro na que Freire, segundo indican, abordará este tema. Os grupos, a este respecto, din que o rexedor “nin sequera se puxo en contacto con ningún dos concelleiros e concelleiras promotores do pleno extraordinario para tratar este asunto”, engadindo que “a prioridade é contratar unha asesoría xurídica para que o Concello de Noia tome a iniciativa neste asunto e redacte un recurso de alzada antes de que remate o prazo, para o que só quedan escasos 22 días”.
Segundo advirten, “non imos permitir que Santiago Freire poña ao Concello de Noia de perfil, se é necesario promoveremos concentracións sociais diante do edificio municipal para que se defendan os intereses de Noia”. En palabras dos tres voceiros, o alcalde de Noia “ten que elixir entre Noia e o seu partido, que é quen permite que se autorice a vertedura de augas con materiais pesados”.
Lembran tamén que que o
21 de xaneiro remata o prazo legal para a convocatoria do pleno extraordinario, mais que “esperan”
que non haxa que esperar ata ese día, dada a trascendencia do asunto que o motiva.
