A Asociación Rianxeira de Empresarios (ARE) e o sector hostaleiro local acordaron co Concello impulsar unha modificación da ordenanza física de terrazas. O acordo responde ás demandas dunha parte do sector hostaleiro, que amosou nos últimos días o seu parcial desacordo coa proposta de pago da taxa pola ocupación de terreos de uso público municipal con mesas e cadeiras que recibiron desde o Servizo de Recadación do Concello.
Ante isto os representantes desta vertente crítica solicitaron unha reunión cos representantes do Goberno local. Esta xuntanza celebrouse este martes 31 de xaneiro, e nela participou a ARE convidada polos seus asociados, representada pola súa secretaria, Conchi Martínez, e asesorada pola avogada Lara Juanatey. Por parte do Concello participaron o alcalde, Adolfo Muíños, a primeira tenente de alcalde, Mari Carmen Figueira, o xefe da Policía Local e persoal técnico do Servizo de Recadación.
Na reunión os hostaleiros presentes puideron aclarar cuestións relativas á ordenanza fiscal reguladora da mencionada taxa e ao proceso de liquidación do que agora están a ser obxecto as súas terrazas logo de dous anos de suspensión da vixencia da taxa pola COVID.
ARE e hostalería informaron que “tendo en conta que a citada liquidación se está a levar a cabo conforme a ordenanza vixente, aqueles hostaleiros que o desexen poderán solicitar o fraccionamento do pago da taxa antes de que acabe o período voluntario de pago”. Ademais, aqueles que non estean de acordo co importe da liquidación poderán presentar, no mesmo prazo, a reclamación que estimen oportuna.
Finalmente, acordouse levar a cabo unha modificación da mencionada ordenanza de terrazas. O Concello vai estudar varias das propostas realizadas polos hostaleiros presentes e a ARE e, en datas próximas, levarase a cabo unha nova reunión para tentar consensuar a nova redacción da ordenanza co obxectivo de aprobala para que entre en vigor o antes posíbel.
A ARE vai elaborar un informe con propostas para incluír na redacción da nova ordenanza e nos vindeiros días convidarase á hostalería local afectada a unha reunión na que se exporá dito informe co obxectivo de acadar unha proposta consensuada para presentar na vindeira reunión co Concello.
