A Policía Nacional de Ribeira identificou a sete persoas pola súa presunta implicación nunha pelexa que tivo lugar a última hora da tarde deste sábado na Avenida Rosalía de Castro. A liorta comezou entre dous adolescentes á que se uniron curiosos e familiares e amigos dos implicados, o que fixo que chegaran a congregarse na zona ata setenta persoas. Segundo testemuñas, houbo polo menos dous feridos.
Ao lugar dos feitos acudiron efectivos da Policía Local e da Nacional. Foron estes últimos os que se encargaron de identificar as persoas. No caso dos menores os axentes retivéronos na rúa ata a chegada dos familiares que se fixeron cargo deles.
