Con puntualidade inglesa na enseada de O Caramiñal deuse a saída da primeira manga da liga de Cruceiros Ría de Arousa 2023. As embarcacións provenientes de todos os clubs da ría dispoñíanse a realizar un percorrido distinto para cada unha das 3 clases.
Os clase regata dispuxéronse para realizar un percorrido de 12,5 millas, os cruceiro-regata de 10,2 e os clase cruceiro uno de 8,6 millas. Todos os percorridos estaban trazados para que as embarcacións compartisen o tramo final: unha cinguida desde a illa de Rúa ata a chegada situada nas inmediacións do porto comercial pobrense.
Os primeiros en cruzar a liña de chegada foron dúas embarcacións da clase cruceiro, o Galopín avantaxou en escasos 50 segundos ao Orlando, vantaxe que non lle valeu para levar o primeiro posto despois da
compensación de tempos. Terceiro foi o Thor, de Guillermo Varela.
No mesmo pelotón chegaron dous barcos da clase cruceiro-regata, o vilagarcián Fixius do club Real Club de Regatas de Galicia, que levaba o triunfo por escasos 2 minutos de vantaxe sobre o local Cámping Ría de Arousa.
Terceiro posto nesta clase para o representante do CN Boiro, Piko Norte.
En clase regata outro barco do Real Club de Regatas de Galicia fíxose co primeiro posto; o Santanas sorprendía aos seus rivais ensinándolles a popa durante gran parte do percorrido, chegando en tempo real por diante de unidades en teoría máis rápidas como o riveirense Moucho ou o Chispetrén
do Club Náutico Arousa Norte, que se conformaron coa segunda e terceira posición respectivamente
A seguinte etapa desta Liga de Cruceiros Ría de Arousa 2023 disputarase o próximo 4 de febreiro baixo a organización do Club Náutico de Rianxo.
