A pesar de sufrir unha derrota na cancha do Río Douro Soria (3-0), o Rotogal Boiro Voleibol regresou con boas sensacións de terras castelás. O conxunto de Emilio Palacio sacou a relucir a súa mellor versión da segunda volta e tratou de ti a ti ao segundo clasificado da Superliga. Finalmente, os locais non deron opción á sorpresa nun choque moi disputado.
O Rotogal Boiro Voleibol non realizou unha óptima posta en escena. Con todo, o conxunto da Cachada puxo sobre o tapete un gran rendemento defensivo para compensar as lagoas exhibidas na recepción e no saque. A pesar de que o equipo foi crecendo no transcurso da primeira manga, non puido evitar que a balanza caese ao lado do Río Douro Soria (25-18).
Os visitantes seguiron crecendo no segundo set. Con boas prestacións no saque e na recepción, e tras conseguir manter o bo ton defensivo, puxeron contra as cordas a un incómodo Río Douro Soria. Con todo, dous puntos de saque de Moreno, ex do Rotogal Boiro Voleibol, sentenciaron a manga por un axustado 26-24.
O Rotogal Boiro Voleibol mantivo a boa liña no arranque do terceiro parcial. Con todo, algunhas decisións arbitrais sacáronos do encontro. O Río Douro Soria tomou un colchón de catro puntos ao seu favor e, a pesar dos intentos dos visitantes por volver meterse no partido, os locais non deron opcións á sorpresa baseados nunha gran contundencia ofensiva (25-17).
