O PSdG – PSOE anunciou que vai levar ao Parlamento de Galicia unha iniciativa para licitar o proxecto do novo Centro de Saúde de Noia. Así o fixeron saber o candidato á alcaldía noiesa Fran Pérez e máis a deputada autonómica Noia Díaz, que veñen de manter varias reunións nas que mostraron a súa preocupación “pola inexistencia da dita licitación do proxecto e da partida orzamentaria específica para tal fin”.
O candidato á alcaldía de Noia polo PSdG-PSOE, Fran Pérez, mantivo dúas xuntanzas consecutivas ca deputada autonómica Noa Díaz, co obxectivo de realizar unha análise da situación local no referente “ao investimento e á orzamentación de partidas de gran relevancia para o concello noiés”. Nestes dúas reunións, celebradas a primeira en Santiago de Compostela e a segunda en Noia, coincidiron en afirmar que “moitos dos proxectos anunciados por parte do actual rexedor noiés non contan con partida orzamentaria específica e definida, como si acontece en investimentos deste tipo noutros Concellos”, sinalaron. En consecuencia, o propio PSdG- PSOE comprometeuse a levar esta cuestión ao Parlamento galego para “evitar a súa paralización”, explicaron, engadindo que ao longo das dúas reunións tratáronse outros investimentos anunciados, como o caso do desdobre do corredor Noia-Brión ou o da Depuradora, que “por agora só conta cunha partida asignada para a primeira parte da obra, estando a segunda parte en espera indefinida”, dixeron.
Estas reunións foron, de acordo co equipo do candidato Fran Pérez, as primeiras “dunha ampla rolda de xuntanzas que o socialista busca manter con cargos a nivel local, autonómico e nacional”. O obxectivo destas xuntanzas sería, en primeiro lugar, “ampliar a perspectiva á hora de abordar os problemas que atravesa o concello de Noia”, ao mesmo tempo que “enriquecer as propostas programáticas coas que Fran Pérez e o PSdG noiés buscarán ilusionar e convencer á cidadanía de Noia”.
