A sala de exposicións do Auditorio Municipal de Rianxo acolle estes días, dende o 3 de xaneiro e até o 1 de febreiro, a mostra de fotografías distinguidas na 16ª edición do Premio Luís Ksado de Creación Fotográfica impulsado pola Deputación da Coruña. Nesta convocatoria resultou gañadora a obra Lume de Brais Lorenzo. As e os finalistas foron Fuco Reyes, Sergi Cámara, Carlos Ximénez, Belén Lozano e Arturo Rodríguez.
Máis en concreto, a serie gañadora, Lume de Brais Lorenzo (Ourense), estará acompañada das series Paisaxes da inexistencia de Belén Lozano López (Lugo); La escoria rebelde de Fuco Reyes (Compostela); Máscaras del Entroido Gallego. Festival VIBO 2022 de Carlos González Ximénez (Madrid); Europa “not welcome” de Sergi Cámara (Barcelona); e Vulcanonautas de Arturo Rodríguez (Tenerife).
A serie gañadora, presentada por Brais Lorenzo, narra a traxedia que, para Galiza e para o mundo, representan os incendios, como consecuencia do cambio climático, do despoboamento do campo e da irresponsabilidade dos pirómanos, entre outros factores. O xurado salientou de Lume “a actualidade do tema contado nunha secuencia que visualiza o drama humano, máis o ecolóxico”.
