En Aguiño esta fin de semana acolle unha nova edición da Semana Cultural Francisco Lorenzo Mariño, que leva o nome do párroco fundador e da asociación que organiza e que vai xa pola súa decimo oitava edición.
Serán tres xornadas con actividades para xente de todas as idades, todas de acceso gratuíto e ata encher aforo, os días 20, 21 e 22 de xaneiro. O primeiro día será o historiador e escritor Daniel Bravo Cores o que dará unha conferencia sobre Aguiño na historia; continuará un pequeno concerto da Orquestra Nova Sons, formada por preto de vinte integrantes de distintas idades que compoñen a canteira da orquestra Sons do Mar de Aguiño para rematar cun ágape para todos os asistentes.
Na mesa estarán ademais da presidenta da asociación, Elvira Pisos, o alcalde de Ribeira, Manuel Ruiz Rivas para inaugurar esta edición; tamén estará Manuel Cartea, presidente de Barbantia, que colabora nesta xornada e o propio Bravo Cores.
O sábado serán os actos do 19 Aº do pasamento de Francisco Lorenzo Mariño, que finou o 16 de xaneiro de 2004; primeiro ás 17 h cunha ofrenda floral e lectura de manifesto cunhas gaitas do país no cemiterio de San Vicente de Noal no Son, onde está enterrado, e despois coa misa aniversario na igrexa parroquial de Aguiño ás 19 h; pechará o día unha representación teatral a cargo do Grupo Charamela de Melide co espectáculo “Adulterio Decente” baixo a dirección de Mari Carmen Neira.
O domingo os máis cativos terán a oportunidade de asistir a un concerto infantil e familiar a cargo de Brais das Hortas baixo o título “Consertasso na horta”, será ás 18 h no conservatorio de Aguiño.
Para a realización destes actos a asociación conta coa colaboración do Concello de Ribeira, Deputación da Coruña, Conresa e outras empresas así como as asociacións Barbantia e Sons.
