Finalmente o Festival de Reis do Concello de Lousame, celebrado este sábado 7 de xaneiro (no Polideportivo Municipal Pilar Barreiro Senra, na Silva) para pechar as actividades de Nadal no municipio, resultou ser un rotundo éxito. Segundo informaron fontes do Consistorio, participaron nel máis de medio milleiro de persoas.
O evento estivo presidido pola alcaldesa Teresa Villaverde, quen estivo acompañada pola concelleira de Cultura, Silvia Agrafojo, e o concelleiro de Obras, Ramón Martínez. Acudiron non só persoas de Lousame, senón doutros concellos da contorna do Barbanza e de comarcas veciñas como a de Santiago.
No Pavillón déronse cita ata cinco inchables diferentes, cun touro mecánico e un DJ que puxo música en directo e que, a petición dos pequenos, non deixaba de empregar fume, o que xerou un ambiente que se asemellaba á néboa na derradeira hora da festa.
Flocos de millo e chocolate con churros eran as propostas gastronómicas, máis empregadas polos pais e nais, que ocupaban as gradas do polideportivo mentres a cativada desfrutaba dos distintos xogos.
