O Concello de Ribeira vén de adxudicar unha actuación dirixida a mellorar o acceso ao Parque Periurbano de San Roque dende a rúa Barbanza, á altura dos Xulgados. Segundo fontes do Consistorio, a solución prevista consiste en implantar “un pavimento máis resistente có actual”, co obxectivo de minimizar os danos da chuvia e “logrando unha superficie de tránsito máis segura”.
Así, a superficie de saburra actual será substituída por un firme de cemento intercalado con lousas de granito abuxardado. O proxecto entraña a demolición parcial dos chanzos do acceso ao parque, coa finalidade de mellorar a accesibilidade.
A intervención ten un prazo de execución de dous meses e a súa execución recaeu en Obras y Seervicios CPB 2021, SL. Comporta un investimento de 36.709.94 euros, IVE incluído.
Outras melloras
O Concello tamén lembrou outras medidas previstas para o Parque Periurbano, como a creación dunha senda turístico-fluvial que se está acabando de crear dende a cidade á altura de Cubeliños e que descorre pola ribeira do río Pedrín en dirección ao lavadoiro alí situado: actuación financiada con fondos europeos Feder por valor de 94.426 euros.
Ademais, o Plan de Sostibilidade Turística de Ribeira que se vai executar entre 2023 e 2024 prevé unha partida para poñer en valor o lavadoiro de San Roque.
