GADISA Retail abre en Boiro o seu primeiro punto de venda franquiado Claudio Express neste 2023. Segundo informaron fontes da compañía alimentaria galega, este establecemento responde a “un concepto de tenda rápido, cómodo e económico”. Está situado na Estación de Servizo Garlou, ao borde da estrada comarcal 305, no lugar de Cimadevila nº 14.
Con 120 m2 de superficie, o Claudio Express dispón dunha variedade de produtos seleccionada para satisfacer as necesidades básicas de alimentación, droguería e hixiene. A área complétase cos servizos de cafetería, gasolineira, taller, boxes e túnel de lavado, ademais de butano e compra e venda de vehículos.
Ademais, o complexo xerou un total de 21 postos de traballo, contando cun amplo horario de apertura de 7 a 23 horas, “para maior comodidade dos clientes”.
No acto de apertura participou Margarita Loureda, copropietaria de Garlou, acompañada polo seu pai, Pepe Loureda, un dos fundadores do grupo. Tamén asistiu a encargada do establecemento, Romina Báez, e parte do equipo.
Por parte de GADISA Retail, acudiron o delegado de área de Pontevedra, Pablo Louro, o director de vendas da franquía, Miguel Freire, e José Antonio Hermida e Sergio Trujillo, coordinador e responsábel de montaxes de franquía, respectivamente.
GADISA Retail: unha folla de ruta de crecemento continuo
“Xerar riqueza socioeconómica na súa contorna” é un dos compromisos de GADISA Retail coa expansión do modelo de negocio franquiado, que alcanza unha rede comercial de 231 establecementos (123 Claudio e 108 Claudio Express), situados en Galicia, Madrid, Castela e León e Asturias. Proporciona emprego a máis de 950 persoas.
