O presidente da Deputación da Coruña, Valentín González Formoso, e o alcalde do Concello de Dodro, Xavier Castro, asinaron este martes 24 de xaneiro un convenio de colaboración para co-financiar as obras de acondicionamento do viario das Brañas de Laíño (Rede Natura 2000). O obxectivo, sinalaron, é fomentar a mobilidade sostible. Na sinatura do acordo estivo tamén o deputado de Economía e Facenda, Antonio Leira.
O orzamento total da execución ascende a 129.639 euros, dos que a entidade provincial achega o 80 % da devandita cifra, que supón 103.711 euros, e a administración local a cantidade restante, que son 25.928 euros.
Segundo explicou o alcalde, Xabier Castro Tourís, “a vía conta con preto de 7 quilómetros de lonxitude e atravesa o municipio desde a Veiga de Lestrove, no límite con Padrón, ata Bexo, preto de Rianxo, discorrendo en boa parte pola contorna natural das Brañas de Laíño”. Trátase dunha vía que “xa é moi usada polos ciclistas actualmente”. Castro agradeceu o apoio da Deputación “para facer realidade un proxecto moi bonito co que pretendemos impulsar a mobilidade a pé e en bici en condicións de seguridade e accesibilidade”.
Pola súa banda, o presidente provincial, Valentín González Formoso, enmarcou este proxecto “na aposta por un novo modelo de mobilidade sustentábel que estamos a realizar desde a Deputación, e que inclúe grandes obras como a Vía Verde Santiago-Cerceda ou a Senda ZEC da contorna do encoro de Cecebre, pero tamén proxectos coma este, que pretenden fomentar a mobilidade a pé ou en bici entre núcleos rurais de concellos coma Dodro”.
As obras contemplan a delimitación das marxes da vía con zonas de protección e prioridade para o tráfico ciclista, que tamén serán empregadas polos peóns, mellorando a seguridade e a funcionalidade para todos os usuarios e usuarias. Realizarase, do mesmo xeito, unha sinalización completa horizontal e vertical, ademais da execución de 21 redutores físicos de velocidade para os automóbiles tipo “lombo de asno”, como medida para regular o tráfico.
Do mesmo xeito, preverase a reparación do firme existente mediante a colocación de grava e tratamento asfáltico semiprofundo, así como o selado de toda a superficie en dous tramos acoutados do viario. Estas actuacións completaranse coa canalización soterrada de 400 metros para colocar a iluminación pública, que inclúe 19 luminarias sobre báculos de 5 metros de altura, e a instalación de 5 bancos de madeira técnica.
